47
ghehult vreedsamych tot sijn behaghen.
Een leeuw van keel1) te voeren plaghen
int velt van ghulden troyaens gheslacht.
Dus heeft dese Dyderick, hoort mijn ghewaghen,
met hem dit wapen in Hollant ghebracht.
Als dit bebrieft werd ende nam soo cracht,
acht hondert drie en tsestich schreef men dat iaer,
maer hoe langhe verdeurde der heeren macht,
wat ychelyck in sijn tijt heeft ghewracht,
leest onder die heeren, daer vindyt claer.
DIEDERICK I
Dits deerste heere, die in Hollant wert grave,
Diederyck gheheten, t'iaer VIIICLVIII beghan
sijn regyment. Hy had een wijf seer rijck van have,
Geva ghenaemt, en was, soo ick bevroeden can,
Philips conynck van Italyen dochter, daer hy an wan
dander Diederyck, een ionghen van seden reene.
tEgmont stichte een nonnenclooster dees edelman
van houte. Die Vriesen verwan hy alghemeene;
die Denen en Noorweghers dwanck hy soo, dat ghene
van de oostersche landen Hollant en mocht deeren.
Tiaer IXC starf hy en regeerde tlant, soot scheene,
XLII iaer. tEgmont begraven met grooter eeren.
DIECERICK II
Dits Diederick Diederycksoone van moede stout.
Dese had conynck Lodewycks dochter van Vranckrycke,
die Hillegont hiet, te wyve ghetrout,
an wien hy een soone wan, alsoot claer blyke,
Aernout, die na hem regeerde, en desgelyke
want hy sint Egbert, aertsbisschop van Trier.
Nadat desen de Vriesen bracht in versyke 2),
vernieuwde hy tclooster tEgmont harde schier
van steenen; sette daerin met blyde chier
monnycken van derselver orden te dier stont.
Als gheregeert had LXXXVIII iaer, dees heere lier,
starf hy en wert begraven tot Egmont.
