52
Doe hy XV iaer hadde ghereghiert,
storf hy te Dordrecht tiaer MCCIII, soo ick vertel,
tEgmont begraven met eeren verciert.
ADA
Ada volchde haren vader, dats wel blykelyck.
Die prince reyngraef Lodewijck van Loon
was haer te manne ghegheven rykelyck,
maer eer hy beslapen mocht die vrouwe schoon,
starf sy. Ghodt brengtse ten hoochsten troon.
WILLEM I
Na Ada quam Willem haer oom tot Oostvrieslant hier
en wert grave van Hollant en had te wyve Alijt,
graef Otten dochter van Ghelre fier,
by wien hy drie sonen wan, des seker sijt:
Floris, die na hem regeerde met herten verblijt,
Otto bisschop tUutrecht en ioncker Willem mede.
Mits hulpe der luyden van Haerlem in sijn ionghe tijt
wan hy Damyaten, die onwinlycke stede;
daer kreghen die van Haerlem met wyser sede
haer wapen. Hy vocht veel stryden in heydenesse.
Hy starf en wert begraven, dat is waerhede,
te Reynsburch. Hy regeerde XIII iaer en sesse.
FLORENS IV
Dits Floris die vierde en nam shertoghe van Brabant
sijn dochter, die Machtelt hiet, te wyve, dats waer,
an wien hy wan conynck Willem en Floris vroom ter hant,
Alit gravinne van Henegouwen eerbaer
en Margriet van Renneberch gravinne. Daernaer,
nadat hy veel stryde ghevoert had, wert hij verslaghen
van den grave van Gleermont verradelyck, tis claer,
te Courby in een tournoyspel, hoort mijn ghewaghen.
Hy wert begraven met ghrooter claghen
te Reynsburch by sijnnen vader, na mijn verstant
schreef men MCCXXXIIH in die daghen;
XII iaer regeerde hy tgraefschap van Hollant.
