54
en sonder ridderlycke name te winnen.
Hy regeerde III iaer en wert begraven mette vaert
te Reynsburg t'iaer MCII(?), wilt dit wel versinnen.
JAN II
Dits graef Ian van Henegouwe ghepresen,
Alit conynck Willems susters soone bequame.
Die grave van Lutsenborch, reyn uutghelesen,
gaf hem Philippa sijn dochter, groot van fame,
an wien hy wan soonen, hooch van name,
graef Willem van Hollant en de grave mede,
Jan van Bolois. Dees heer had, soo ick wel rame,
teghen die Vlaminghen grooten onvrede,
maer Willem sijn soon die Vlaminghen t'onderdede
en verwan se. Doe starf dees edel heere
en wert begraven te Valencijn in die stede.
V iaer regeerde hy Hollant met groote eere.
WILLEM III
Dits ghoede graef Willem, die daerna quam,
sconyncx suster van Vranckrijck nam hy ten beghinne,
Iohanna Valoys, en wan by haer, soo men vernam,
Willem sijn navolgher, Margriet die roomsche keyserinne,
Philippine conynghinne van Enghelant en die gravinne
Iohanne van Gulick. Die Vlamynghen verwan hy coen.
Hy hielt te Haerlem een hof acht daech, soo ick bekinne,
met XX graven en bannerheeren ende doen
al ridderen. Dees heer was na mijn bevroen
stathouder des keysers over veel heeren landen.
Na XXXII iaer sijns regiments most hy te sterven spoen.
Begraven te Valencijn, bevolen in Godts handen.
WILLEM IV
Dits Willem sijn soone, wiens wijf hiet Iohanna,
hertoch lans dochter van Brabant ghebooren,
an wien hy gheen kinders wan, soo ick versta.
Drie werf tooch hy om die heyden te verstooren.
Int derde wedercommen, dat suldy hooren,
