55
hielt hy een hof te Colen wel openbaer.
Die keurvorsten tsamen leyden hem te vooren
om dat keyserrijck te willen ontfanghen daer.
Uutrecht belegde hy ende want daernaer,
maer in Vrieslant by Staveren wert hy verslaghen,
doen hy gheregeert had slechts neghen iaer,
ende wert te Valencijn te grave ghedragen.
MARGARETA
Na Willem quam sijn suster keyserin Margriete,
die by van Beyeren keyser Lodewijck hadde ghewonnen
twee soonen, hertoch Willem, die men den dolle graef hiete,
en hertoch Aelbrecht. Als doen twee partyen beghonnen,
Hoeck en Kabbeljauw, soodat onder der sonnen
niet strijt en gheschiede soo over fel
als tusschen haer en doudste soone, want root beronnen
was die Mase van bloede, verstaet dat wel,
maer hy behielt Hollant en Seelant na tswaer rebel
en sy tgraefschap Henegouwen, alst was anschijn.
MCCCLI schreef men, als dit ghevel.
Ses iaer sy Hollant besat; begraven te Valencien.
WILLEM V
Hertoch Willem van Beyeren, grave van Henegouwen,
van Hollant, Seelant, Vrieslant, alsoo wy lesen.
sHertogen dochter van Lancaster was sijn wijf in trouwen,
by wien hy gheen kinderen en wan, dees heere ghepresen.
Ontrent Keten verdarf hy tlant en boven desen
versloech hy den maerschalck van Eembrug in den ghekyve 9)
In een senghen 10) tusschen Brabant en Vlaenderen gheresen
wast dat hy seyde: hoelden my daerby, ick blyve.
Hy wert verkeert van sinnen en van bedryve
en wert XIX iaer ghestelt in vaster hoede.
Hy regeerde VI iaer ende wert, soo ick schrijve,
te Valencijn begraven, elck dit bevroede.